<<    <     Sang Prabu Sane Ngrahayuang     11     >    >> 
Hyang Yesus Lekad
142 Wenten cerita sujati saking Cakepan Sucine indik Hyang Yesus lekad.
143 Ring negara anak Ibrani,
wenten anak lanang mapesengan “Yusup.”
Dane Yusup puniki anak sane dharma.
Dane Yusup sampun masemaya jagi nganten sareng dane Maria,
anak sane bajang kari sukla.
144 Ring dina anu,
dane Yusup napetang dane Maria tunangan ipune sampun mobot.
Krana dane anak dharma,
dane nenten purun nyelekin dane Maria ring anake akeh.
Nah raris ipun meled ngalain dane Maria,
sawireh dane Maria punika mobot.
145 Kacerita mangkin,
dane Yusup sedek sirep.
Risedek sirep,
raris ipun ngipi wenten malekat saking Sang Hyang Tunggal rauh saha mabaos sapuniki,
146 “Eda ja cening jejeh nyuang Maria anggon rabin ceninge,
sawireh belingan Maria ento uli Roh Sang Hyang Tunggal.
Ia lakar nglekadang pianak muani,
lan cening lakar ngadanin anak cerike ento ‘Yesus.’”
147 Nah,
irika raris dane Yusup bangun saking sirepne.
Dane raris ngambil dane Maria kadadosang rabi.
Nanging ipun nenten sirep sareng dane Maria sekadi anake marabian,
kantos anake alit punika lekad.
148 Kacerita mangkin,
dane Maria nglekadang oka lanang.
Nah,
raris anak alite punika kawastanin Yesus,
artinyane “Sang Hyang Tunggal ngrahayuang.”
Krana Ida jagi ngrahayuang anake sane nyembah Ida saking dosan-dosannyane.
Penuntun mabligbagan ring pasamuan:
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?”
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
“Napi sane plajahin iraga indik Sang Hyang Tunggal ring ceritane puniki?”
“Napi sane plajahin iraga indik manusa saking ceritane puniki?”
“Sekadi napike sapatutne iraga nyalanang idup manut pengajahane puniki?”
“Kapining sirake sapatutne iraga nyeritayang malih ceritane puniki?”